Gjykata e Apelit të Posaçëm vendosi të rrëzojë ankimimin e Belinda Ballukut dhe të lërë në fuqi masën e pezullimit nga ushtrimi i funksioneve për të, ndonëse ajo është shkarkuar nga detyra si zv.kryeministre dhe ministre e Infrastrukturës dhe Energjisë.
Gjatë seancës avokati ka kërkuar shfuqizimin/revokimin e masës së sigurimit personal me karakter ndalues, por SPAK ka kërkuar që masa të mbetet në fuqi.
Gjykatësja Miliana Muça, pasi e ka shqyrtuar çështjen, e ka gjetur të drejtë vendimin e GJKKO që e pati pezulluar më herët Ballukun nga ushtrimi i funksioneve.
Apeli i Posaçëm e kishte pezulluar shqyrtimin e ankimimit të Ballukut që lidhej me pezullimin, derisa të shprehej Gjykata Kushtetuese, e cila e riktheu masën e pezullimit për ish-zv.kryeministren.
Ndaj Ballukut është në fuqi me vendim të Apelit të Posaçëm edhe masa e ndalimit për të dalë jashtë vendit.
Ish-zv.kryeministrja dhe ministrja e Infrastrukturës është duke u hetuar për abuzime me tenderat e rrugëve në vlerën e miliona eurove.
SPAK ka kërkuar leje për arrestimin e saj dhe Kuvendi pritet të votojë për këtë çështje në seancën e datës 12 mars.
