Avokati i njohur Gylsen Zhllima ka bërë të ditur kandidaturën e tij për postin e kryebashkiakut të Tiranës në zgjedhjet e pjesshme që do të mbahen më 9 nëntor. Ai e bëri këtë njoftim përmes një postimi në rrjetet sociale, duke prezantuar edhe sloganin e tij “Tirana, vizioni ynë”, me të cilin do të kërkojë besimin e qytetarëve të kryeqytetit.
Zgjedhjet e pjesshme për Bashkinë e Tiranës do të zhvillohen në të njëjtën ditë në gjashtë bashkitë e vendit. Për Tiranën, deri tani janë zyrtarizuar tre kandidatura: Ogerta Manastirliu nga Partia Socialiste, Arlind Qori nga Lëvizja Bashkë dhe aktori Florjan Binaj, i cili kandidon si i pavarur dhe synon të marrë mbështetjen e qytetarëve nga të dy kampet politike, majtas dhe djathtas.
Nga opozita nuk ka ende një kandidat të konfirmuar. Një ditë më parë, Sali Berisha deklaroi se do t’u japë dy ditë kohë kandidatëve të pavarur për t’u shprehur dhe më pas do të njoftojnë se cilin prej tyre do të mbështesin. Në listën e emrave që kanë shprehur interes për kandidim nga opozita janë Ermal Hasimja, Florian Haçkaj dhe Agron Haxhimali.
