Endri Shabani u zgjodh sot Avokat i Popullit, mes kontestimit të opozitës, flakadanëve në sallë dhe një qëndrimi me duart në xhep, si për të na kujtuar se në shtetin shqiptar serioziteti ka marrë fund prej kohësh.
Në një seancë të tensionuar, Avokati i ri i Popullit nuk harroi t’u dërgonte një puthje me dorë edhe 35 deputetëve të opozitës, që me firmat e tyre propozuan emrin e tij, për t’u votuar më pas nga mazhoranca disa ditë më parë në seancë plenare.
Emri i Endri Shabanit shkaktoi debate të ashpra mes mazhorancës dhe opozitës, të cilat, mesa duket, nën rrogoz kishin rënë në ujdi për kandidaturën, ndërsa në dukje secila palë luante rolin e të mërziturit.
Pas votimit, Sali Berisha la të kuptohej se Edi Rama “duhet ta gëzojë” Shabanin si Avokat të Popullit. Por revolta e demokratëve në rrjetet sociale duket se e detyroi të ndryshojë qëndrim dhe t’i bindet kërkesës së Gazment Bardhit për ta çuar procedurën e zgjedhjes së tij në Gjykatën Kushtetuese.
