Ish-kandidati për deputetë, Aulon Kalaja, ka kritikuar Partinë Demokratike për vonesën në përgatitjen e garës elektorale për bashkinë e Tiranës.
Në emisionin 3D në RTSH, Kalaja tha se “ndërkohë që opozita do të duhej të përgatitej me një emër, tani më është kohë e humbur dhe kandidati që duhej të dilte dje, nuk del as nesër, se sot nuk ka dalë”.
Ai theksoi se mazhoranca ka shpallur kandidatin që më 11 shtator, ndërsa opozita nuk ka reflektuar seriozitetin e duhur për një garë të tillë. Sipas tij, opozita ka humbur një moment kritik që prej shkurtit, kur Erion Veliaj u arrestua, duke mos prezantuar një figurë të qartë për kryetar bashkie.
“Edi Rama, me gjithë makinerinë e vet shtetërore, me deputetë e ministra, ka një emër të shpallur. Nga opozita nuk kemi kandidat. Politika duhet të ketë seriozitet. Opozita duhej të dilte me një emër në hije që në atë moment. Tani duket sikur është hapur një garë se kush nuk duhet të kandidojë, jo kush duhet të kandidojë. Kjo është çmenduri”, tha ai.
Kalaja e cilësoi Ogerta Manastirliun si një kandidate të dobët, por me mbështetje të fortë partiake, ndërsa i bëri thirrje PD-së të qartësojë pozicionin e saj edhe në raport me partitë aleate.
