Ilir Meta ju kishte bërë thirrje ambasadave dhe ndërkombëtarëve të ndiqnin nga afër gjyqin e tij, i cili nisi sot në themel. Por në sallë nuk ishte asnjë përfaqësues i huaj, duke lënë në baltë kreun e Partisë së Lirisë.
Sekretari i Përgjithshëm i kësaj partie, u pyet nga gazetari Armand Bajrami se si komentohej bojkoti i ndërkombëtarëve, por Tedi Blushi u përpoq t’i shmangej faktit të hidhur, se Metës nuk i doli në krah askush.
“Unë nuk jam e nuk kam qenë zëdhënës i ambasadave. Por jam krenar që kam qenë zëdhënës i Presidentit të Republikës së Shqipërisë, i një kështjellë që bëri gjithçka mundi në atë kohë, për të garantuar pavarësinë e një sistemi gjyqësor, i cili, e patë sot se çfarë standardesh ka. Ne kemi për detyrë që t’i ftojmë të gjithë, ata që janë mashtruar apo kanë preferuar të mashtrohen. Është e papranueshme, është irrituese, që një proces i këtij niveli të bunkerizohet.
Qëllimi është të mos dalin në dritë të diellit arsyet e vërteta të atij arresti gjeopolitik”,-tha ndër të tjera, Tedi Blushi.
