Edi Rama ka vendosur të mbledhë në datën 11 shtator Asamblenë e PS. Në këtë takim pritet të paraqiten dhe emrat e rinj të kabinetit qeveritar dhe riorganizimi i ekzekutivit. Burime për VNA bëjnë me dije se në mbledhjen e parashikuar në dt. 11 shtator do të hidhen dhe piketat për atë që Kryeministri e ka konsideruar qeverisja për 2030.
Në fakt, sa më lart nuk është ndonjë lajm i papritur. E reja qëndron se, ndryshe nga herët e tjera, Edi Rama ka vendosur ta zgjasë agoninën e emrave që do bëhen ministra dhe të atyre që do i lërë pa post edhe ca ditë të tjera. Zakonisht Asambleja e PS për qeverinë e re është zhvilluar gjithmonë në të dielën e fundit të gushtit. Por këtë herë, avujt e pushtetit pa hesap e kanë bërë më të bukur lojën e ankthit që Edi Rama e luan kaq bukur me vartësit e tij. Deri në datë 11, makina propagandistike e mazhorancës do të hedhë në treg emra të mundshëm për ministra, ndonëse përveç Edi Ramës askush nuk e di se cilët do të jenë ata. Demokraci e brendshme dhe meritokraci, jo shaka.
Gjatë ditëve të fundit, në zyrën e tij në Kryeministri, Rama ka takuar një numër të konsiderueshëm bashkëpunëtorësh, pjesa më e madhe e të cilëve kanë shpresën se do jenë sërish ministra apo drejtues të lartë. Në një parti që është shndërruar në një makineri propagande me publikun, por shurdh-memecë me zhvillimet e brendshme, duket se ditët e ardhshme do të jenë i vetmi emocion politik prej shumë vitesh.
