Deputeti i Partisë Socialiste, Erion Braçe, ka reaguar lidhur me procesin gjyqësor ndaj kryebashkiakut të Tiranës, Erion Veliaj, duke theksuar se nuk dëshiron të komentojë çështjet që janë në shqyrtim nga drejtësia.
I pyetur nga gazetarët, Braçe u shpreh se politikanët duhet të shmangin komentet mbi vendimet e gjykatave dhe proceset gjyqësore.
“Besoj që të gjithë ne politikanët, proceset gjyqësore dhe vendimet e gjykatave nuk duhet t’i diskutojmë. Kështu që do vazhdoj të bëj të njëjtën gjë që kam bërë deri më tani, që të mos komentoj as prokurorët, as gjyqtarët. Secili ka pozicionin e vet dhe është në të drejtën e vet”, deklaroi ai për mediat.
Megjithatë, Braçe shtoi se mbi të gjitha në çdo proces duhet të garantohet respektimi i të drejtave të njeriut.
Deklarata e tij vjen në një moment kur deputeti socialist është përfolur si një nga emrat që mund të kandidojë për Bashkinë e Tiranës, në rast se posti i kryebashkiakut mbetet vakant. Në këtë kuptim, qëndrimi i Braçes duket një përpjekje për të ruajtur balancën mes drejtësisë dhe solidaritetit politik – një pozicion që për shumëkënd duket as mish, as peshk.
