Pas refuzimit nga mazhoranca të interpelancës për çështjen “Aruba”, Gazment Bardhi shpërtheu në Kuvend duke akuzuar kryeministrin Edi Rama për lidhje me biznesmenin Artur Shehu, i cili sipas tij ka përfituar leje ndërtimi pas një takimi të zhvilluar në Aruba me persona të përfshirë në aktivitete kriminale ndërkombëtare.
Bardhi iu referua dokumenteve hetimore nga Italia dhe Belgjika, ku sipas tij “është diskutuar për investime që kërkonin mbështetje dhe miratim nga qeveria shqiptare”.
Ai theksoi se pas takimit në Aruba, Rama dhe ministrja Kumbaro i kanë dhënë Shehut leje ndërtimi për një objekt në një zonë të ndaluar ndërtimi në Vlorë.
“Një prokuror italian ka thënë se nuk është ekzagjerim ta quajmë Shqipërinë ‘narko-shtet’. Ne kërkuam interpelancë me Ramën për të ditur nëse Artur Shehu ka përfituar leje, licenca apo koncesione, por mazhoranca po shmang llogaridhënien,” tha Bardhi.
Kreu i grupit parlamentar të PD, shtoi se një prokuror italian, në një bisedë me një gazetar investigativ, ka deklaruar se nuk është aspak e tepruar të cilësohet Shqipëria si një “narko-shtet”.
“Një prokuror italian i ka thënë një gazetari investigativ se nuk është ekzagjerim ta quajmë Shqipërinë ‘narko-shtet’”, theksoi Bardhi.
Duke iu referuar refuzimit të interpelancës me kryeministrin, Bardhi akuzoi mazhorancën se po shmang llogaridhënien dhe kërkoi përgjigje për përfitimet e mundshme të Artur Shehut nga institucionet shtetërore.
“Për këtë arsye, një grup deputetësh kërkuan interpelancë me Ramën, ku sipas Kushtetutës ai ka detyrë të vijë dhe të japë llogari. Kishim bërë disa pyetje të thjeshta dhe jam i shokuar nga përgjigja e Niko Peleshi. Kishim disa pyetje për Ramën nëse Artur Shehu ka përfituar apo jo leje, licenca, procedura prokurimi publik apo koncensione në Shqipëri, dhe çfarë masash ka marrë kryeministri si drejtues i Këshillit të Ministrave për të parandaluar ndikimin e krimit të organizuar në ekonomi dhe për të mbrojtur konkurrencën e lirë në treg”, tha Bardhi.
