Ministrja e Arsimit, Mirela Kumbaro, gënjeu publikisht nga foltorja e Kuvendit duke thënë se në ministrinë që ajo drejton nuk ka asnjë person me masë arresti.
“Askush sot që flasi, në Ministrinë e Arsimit nuk është në asnjë masë arresti dhe as pezullimi, përfshirë edhe zonjën në fjalë (Arta Dollani). Gënjeshtër, gënjeshtër, gënjeshtër”, tha ajo.
Këtë deklaratë, Kumbaro e bëri pasi u akuzua nga deputetët e opozitës se po mbronte Arta Dollani, e cila mban postin e drejtoreshës së përgjithshme në Agjencinë Kombëtare të Arsimit Parauniversitar në ministrinë e Arsimit.
Në fakt, ndryshe nga çfarë deklaron ministrja, vartësja e saj është në masë arresti shtëpiak, lëshuar nga Prokuroria e Durrësit për 33 persona pas hetimeve për transportin e mbetjeve të rrezikshme të kompanisë KURUM.
Akuza ndaj Dollanit lidhen gjatë kohës kur ajo mbante postin e drejtoreshës së Agjencisë Kombëtare të Mjedisit, e cila ishte emëruar po nga Mirela Kumbaro, e cila në atë kohë ishte ministre e Turizmit dhe Mjedisit. Ajo akuzohet për përfshirje në procedurat që lidhen me lejimin dhe menaxhimin e eksportit të mbetjeve.
Megjithatë, pavarësisht masës së sigurisë, duket se Dollani nuk ka humbur besimin e shefes së saj, Mirela Kumbaro, e cila jo vetëm që nuk e shkarkon nga detyra, por paturpësisht shfaqet nga foltorja e Parlamentit për të mohuar një fakt që lehtësisht është i verifikueshëm.
