Kuvendi i Shqipërisë do të miratojë sot një ligj të ri për Gardën e Republikës, i cili korrigjon veprimet e PS pak kohë më parë.
Kur i duhet të emëronte në krye të gardës, kushëririn e një oligarku, Rama ndërhyri në ligj, duke bërë që drejtori të zgjidhej me konkurs dhe mund të ishte edhe nga jashtë rrethit të gardistëve.
Por Ermal Onuzi nuk e pati të gjatë në krye të institucionit dhe pas ikjes së tij, Garda e Republikës është pa drejtor.
Siç bën zakonisht kur do të fshihet pas gishtit, Edi Rama urdhëroi një deputete të tij (Antoneta Dhima) të propozonte ndryshime ligjore, që rikthenin caktimin e kreut të gardës, jo me konkurs, por me emërim nga kryeministri dhe duhet vendosur kritere specifike (duke ndryshuar dhe arsimin minimal të kërkuar) vetëm që të shkonte përzgjedhja tek një emër fiks i preferuar paraprakisht.
Por nëse Rama ndryshoi mendje për 2 vjet, vetë Antoneta Dhima ndryshon mendje për 2 muaj. Dokumentet janë siguruar nga VNA, dhe tregojnë si lobimet në moment të fundit dhe jo studimi, përcaktojnë fatet e ligjeve në vend.
Nismën e parë ajo e ka depozituar më 27 shkurt, por dje, pak orë para seancës plenare, ka ndërhyrë në ligj, duke sjellë amendamente mbi propozimin e saj, dhe në këtë rast i është bashkuar edhe Erjon Malaj si deputet firmëtar.
Sigurisht, ajo nuk i ka hequr Edi Ramës monopolin për të zgjedhur në krye të Gardës të paracaktuarin, por ka ndërruar mendje një ditë para seancës për rekrutimet në Gardë dhe për transferimet e tyre.
Në amendamentet e reja, në vend të shfuqizimit, propozohet një formulim tërësisht i ri për nenin 23. Ky ndryshim synon pranimin në Gardë të punonjësve nga Forcat e Armatosura, Policia e Shtetit dhe strukturat e tjera të sigurisë për nevoja të veçanta (si juristë, mjekë, inxhinierë etj.), duke ruajtur vjetërsinë e shërbimit dhe gradën.
Projektligji fillestar i sjellë në shkurt nga zonja Dhima, përcaktonte se kohëzgjatja e transferimit të një punonjësi garde zgjat sa ekzistojnë shkaqet që e kanë diktuar atë. Amendamentet e reja vendosin afate konkrete kohore: kohëzgjatja e transferimit zgjat si rregull deri në 6 muaj, por jo më shumë se 1 (një) vit.
