Kreu i Lëvizjes Bashkë, Arlind Qori, u ka bërë thirrje qytetarëve që të marrin pjesë në një protestë përpara Parlamenti i Shqipërisë ditën e mërkurë në orën 18:00.
Në një video të publikuar në Facebook, Qori shprehet se, ndërsa qytetarët e thjeshtë përballen me dënime të rënda për shkelje të vogla si parkimi i dyfishtë, kryeministri Edi Rama mbron partnerët e vet politikë.
Sipas Qorit, kryeministri ka frikë se nëse Ballukut i hiqet imuniteti dhe përballet me hetim të plotë, ajo mund të zbulojë dhe të tregojë për abuzimet që, sipas tij, janë bërë së bashku nga drejtuesit e qeverisë.
“Shqipëria është një vend ku çdo qytetar i thjeshtë rrezikon burgun për parkim të dyfishtë, ndërsa Rama i konsideron partnerët e vet mbi ligjin dhe nuk lejon hetimin e tyre të plotë, duke u mundësuar atyre të vazhdojnë të kërcënojnë dëshmitarët dhe të manipulojnë provat”, shtoi Qori në video.
Kujtojmë se protesta e Qorit është një ditë para tubimit të thirrur nga Partia Demokratike që do të mbahet ditën e enjte, e cila po ashtu do të jetë para Parlamentit.
