Kreu i Lëvizjes Bashkë, Arlind Qori, i ftuar në emisionin “Real Story” në ABC News, komentoi zhvillimet e fundit politike pas shkarkimit të Erion Veliajt nga Bashkia e Tiranës dhe dekretit të Presidentit Bajram Begaj për mbajtjen e zgjedhjeve të parakohshme më 9 nëntor në gjashtë bashki.
Qori deklaroi se Veliaj ka të drejtë të ankimojë vendimin dhe se askush nuk mund t’ia mohojë këtë të drejtë ligjore. Sipas tij, ndërhyrja e Presidentit në këtë moment krijon një ngërç institucional, duke ndërhyrë në kompetencat e Gjykatës Kushtetuese.
“Erion Veliaj ka të drejtë ta ankimojë dhe nuk ia ndalon dot askush. Më duket sikur Presidenti ka marrë kompetencat e Gjykatës Kushtetuese, dhe e gjithë kjo na fut në një qorrsokak,” – u shpreh Qori.
Ai kërkoi që Gjykata Kushtetuese të reagojë urgjentisht për ankesat në pritje, në mënyrë që të mos krijohet një situatë e pasigurt ligjore në prag të procesit zgjedhor.
“Gjykata Kushtetuese duhet të shprehet një orë e më parë për ankesën e fundit, përndryshe rrezikojmë të hymë në zgjedhje dhe ajo të dalë me vendim në minutën e fundit duke i anuluar,” – theksoi Qori.
Sipas tij, Gjykata duhet të marrë dy vendime urgjente: një për dekretin e Presidentit dhe një për shkarkimin e Veliajt, për t’i dhënë drejtim situatës dhe për të shmangur krizën institucionale.
