Ndërsa shqiptarët ishin të angazhuar me ndeshjen e kombëtares në Serbi, në Tiranë u inagurua në heshtje një tjetër projekt i bujshëm artistik me fonde publike: “Tirana Moons”, një instalacion prej druri i vendosur në Sheshin “Nënë Tereza”, me një kosto prej rreth 390 mijë euro.
Instalacioni, i cili përbëhet nga kupola në formë hënash, është realizuar nga studioja vendase “UDV Architects” në bashkëpunim me studion austriake “Precht”, e njëjta që qëndron pas ndërtimit të shumëdebatuarit “Park Eden” në oborrin e Kryeministrisë – një projekt prej 3.6 deri në 4 milionë euro, gjithashtu i bazuar në strukturë druri.
Si në rastin e "Parkut Eden", edhe për "Tirana Moons" mbetet e paqartë se si është përzgjedhur studioja e huaj, dhe çfarë kriteresh janë ndjekur për justifikimin e investimit, për një instalacion të përkohshëm me kosto të lartë.
Projekti
Sipas përshkrimit zyrtar, “Tirana Moons” përbëhet nga disa pavijone sferike prej druri, të mbuluara me tenda, ku disa prej tyre janë të pajisura me rafte librash. Gjithashtu, përfshihen:
100 vazo betoni
50 stola
260 metra katror hapësirë të gjelbër të rikuperuar
Hapësira të dedikuara për evente dhe ndërveprim qytetar
Projekti thuhet se krijon një ambient rekreativ dhe artistik, që "ndërthur estetikën me funksionalitetin publik".
Në kontrast me boshllëkun kulturor të Tiranës
Por ndërkohë që fondet shkojnë për instalacione të tilla, kryeqyteti vazhdon të përballet me mungesë të theksuar të institucioneve kulturore funksionale. Biblioteka Kombëtare vazhdon të jetë e mbyllur, ashtu si edhe Muzeu Historik Kombëtar dhe Galeria e Arteve, që prej kohësh ndodhen në proces rindërtimi. Teatri Kombëtar në shtëpi provizore, Cirku i Tiranës gjithashtu jashtë funksioni, duke lënë bosh një pjesë të rëndësishme të jetës kulturore të qytetit.
Kështu, ndërsa “Hënat e Tiranës” promovohen si një hapësirë për ndërveprim dhe kulturë alternative, mbetet e paqartë nëse ky projekt mund të kompensojë boshllëkun e thellë kulturor në kryeqytet – apo nëse është thjesht një tjetër “vepër imazhi” me kosto të lartë për taksapaguesit.
