Deputeti i Partisë Demokratike, Arjan Ndoja, këtë të martë ka kritikuar vendimin e deputetëve të opozitës për t’u tërhequr nga mbështetja për kandidatët për Avokatin e Popullit, duke e cilësuar këtë veprim si të pamoralshëm dhe të papranueshëm politikisht.
Gjatë diskutimeve në Komisionin e Ligjeve, Ndoja theksoi se, pavarësisht debatit moral, nga pikëpamja juridike tërheqja e firmave sjell automatikisht humbjen e mbështetjes për kandidatët.
Sipas tij, hapi i radhës duhet të jetë rihapja e procedurës dhe shpallja e kandidatëve të rinj në përputhje me kuadrin ligjor. Duke iu drejtuar mazhorancës, deputeti ngriti edhe çështjen e vullnetit politik për t’ia lënë opozitës drejtimin e institucionit të Avokatit të Popullit.
“Nga ana morale kjo nuk është as burrërore, as etike. Por juridikisht bie mbështetja kur tërhiqet firma. A keni vullnet politik t’ia lini opozitës këtë post? Nëse po, e rihapim procedurën për të risjellë kandidatët konform rregullave”, tha Ndoja.
Arjan Ndoja ishte një nga deputetët që mbështeste kandidaturën e Jola Hysajt nga opozita. Procedura për propozimin e saj hasi në probleme pasi nga 28 firma rezultuan të ishin vetëm 27. Kjo situatë duket se ka prekur edhe “burrninë” e deputetit të Durrësit, i cili ka propozuar rifillimin e procesit nga e para.
