Gjykata e Posaçme e Apelit vendosi të zbusë masën e dënimit për ish-zyrtarët e Bashkisë së Tiranës, të akuzuar për një nga fraksionet e dosjes 5D.
Për ish-drejtoreshën e “Tirana Parking”, Eglantina Zere, u pezullua dënimi me burgim dhe ish-zyrtarja u vendos në shërbim prove për një afat 1-vjeçar.
Edhe për të pandehurit Enkelejda Qyta, Bruno Koçi, Rivjola Baxha, si dhe Kristo Zhulati u zbut masa e dënimit dhe nga burg u vendosën në 12 muaj shërbim prove. Më herët, Gjykata e Posaçme i dënoi ish-zyrtarët me burg, pasi i akuzonte se favorizuan në mënyrë të paligjshme një kompani të zotëruar në mënyrë të tërthortë nga ish-kreu i Ujësjellësit, Redi Molla dhe ai i IMT-së, Mariglen Qato, duke e ushqyer atë me tendera publikë.
Ish-drejtorja e përgjithshme e institucionit “Tirana Parking”, Eglantina Zere, dhe katër zyrtarët e tjerë të Bashkisë Tiranë, Rivjola Baxha, Enkelejda Qyta, Bruno Koçi dhe Kristo Zhulati, janë cilësuar fajtorë dhe dënuar për akuzën “Shkelja e barazisë së pjesëmarrësve në tendera apo ankande publike”.
Për aferën 5D po gjykohen edhe disa ish-zyrtarë të tjerë të lartë, përfshirë Redi Molla, Mariglen Qato dhe Taulant Tusha.
