Ambasada e Shteteve të Bashkuara në Tiranë ka njoftuar se, për shkak të vonesës në miratimin e fondeve buxhetore nga Uashingtoni, aktiviteti i saj do të reduktohet ndjeshëm. Pasojat prekin kryesisht shërbimet konsullore dhe komunikimin publik me qytetarët shqiptarë.
Në një reagim të publikuar në rrjetet sociale, ambasada sqaron se llogaria e saj në Facebook nuk do të përditësohet më rregullisht, me përjashtim të rasteve kur ka informacione urgjente për sigurinë. Ky kufizim do të mbetet në fuqi deri në rikthimin e plotë të funksionimit normal.
Megjithatë, për qytetarët që kanë aplikuar ose kanë shërbime të planifikuara, ambasada siguron se proceset për pasaporta dhe vizat për tranzit në SHBA do të vijojnë, por “sipas mundësive”, duke nënkuptuar kufizime në kapacitetin e punës.
“Për më shumë informacion mbi shërbimet tona dhe statusin operativ, vizitoni travel.state.gov”, thuhet në njoftimin zyrtar të ambasadës.
Kjo situatë vjen si pasojë e mosmarrëveshjeve politike në SHBA, që kanë sjellë vonesa në miratimin e buxhetit federal, duke prekur edhe punën e përfaqësive diplomatike amerikane në vende të ndryshme të botës.
