Ambasada Gjermane në Tiranë ka reaguar pas incidenteve të shënuara gjatë protestës së opozitës një ditë më parë, duke dënuar ashpër aktet e dhunës.
Në një deklaratë zyrtare, ambasada thekson se protestat politike dhe e drejta për të demonstruar janë thelbësore në një shoqëri demokratike, por nuk mund të justifikojnë dhunën ndaj personave apo objekteve.
“Ambasada Gjermane dënon dhunën e papranueshme në kuadër të demonstratave të djeshme. Protestat politike dhe e drejta për të demonstruar janë të drejta themelore në çdo shoqëri demokratike. Por ato nuk mund të përligjin asnjëherë dhunën ndaj personave apo objekteve”, thuhet në reagim.
Më tej, ambasada u bën thirrje përfaqësuesve të partive politike që të marrin përgjegjësi dhe të distancohen qartë nga aktet e dhunës.
“Ne kërkojmë prej përfaqësuesve të partive politike përgjegjëse të distancohen në mënyrë të paekuivoke nga dhuna”, përfundon deklarata.
