Kandidati i opozitës për bashkinë e Tiranës mbetet ende enigmë, ndërsa për doktorin Ilir Alimehmeti kjo është një kohë e humbur kot. Në një intervistë për A2CNN, Alimehmeti kritikoi PD-n duke thënë se “duhej të ishim mbledhur që këtë çështje mos ta kishte lënë zvarrë”.
Megjithëse përflitet si një nga emrat më konsensual për Tiranën sot, Alimehmeti shprehet se është gati për garën e vitit 2027. Për garën që pritet të mbahet tani, ai është dakort me zërat për të qenë kandidat më i votuari i PD në zgjedhjet e 11 majit, duke hedhur një 'thumb' për kolegen e tij, Jorida Tabaku. Ndërkoh, kjo e fundit deri tani nuk ka reaguar, duke lënë të kuptohet se nuk e ka në plan të lërë mandatin e deputetit për t'u përballur me Manastirliun.
Alimehmeti gjithashtu është i mendimit që Erion Veliaj duhej të ishte shkarkuar që kur ata dorëzuan peticion për mungesën e tij prej tre muajsh në detyrë. Por nuk është dakort me mënyrën që ka zgjedhur kryeministri për ta larguar nga detyra. Sipas tij, procedura është në shkelje të ligjit, madje mendon që Veliajt i duhet dhënë e drejta që të jetë i pranishëm në mbledhjen e Këshillit Bashkiak ditën e martë.
