Pas “djegies” së emrit të Florian Binajt nga Sali Berisha për garën e ardhshme për Bashkinë e Tiranës, anëtari i Këshillit Bashkiak, Ilir Alimehmeti, ka dalë sërish në skenë duke rikthyer kërkesën e tij për të qenë kandidati i Partisë Demokratike në zgjedhjet e vitit 2027.
Gjatë një bashkëbisedimi me studentë, Alimehmeti ka deklaruar se vazhdon të jetë “në pritje të përgjigjes” nga PD lidhur me kandidaturën e tij, të cilën thotë se e ka dorëzuar prej kohësh. Sipas tij, procesi i shqyrtimit po zgjat, ndërsa numri i kandidatëve mbetet i kufizuar.
“Jam treguar i qartë: Jam i disponueshëm dhe në pritje të përgjigjes. Kandidatura ime është dorëzuar dhe pritet të shqyrtohet së shpejti. Megjithatë, mund të them se numri i kandidaturave është i kufizuar”, tha ai.
