Në një emision televiziv, Alesia Balliu paralajmëroi se në ditët në vijim do të shpallë zyrtarisht kandidaturën e saj për kryetare të Partisë Demokratike.
Ajo tha se vendimi për të hyrë në garë vjen edhe si përgjigje ndaj mbështetjes që, sipas saj, po merr nga të rinjtë dhe simpatizantët e partisë.
“Në ditët në vijim do shpall kandidaturën time për kryetare të PD. Kam një detyrim për gjithë ata të rinj që më shkruajnë dhe më mbështesin. Padiskutim që do të jap një platformë dhe do të dorëzoj dokumentet”, u shpreh Balliu.
Gjatë intervistës, ajo theksoi se ka pasur një angazhim të gjatë në strukturat e Partisë Demokratike, sidomos në forumet rinore dhe në organizimin e rinisë në qarkun e Elbasanit.
“Kam qenë në krye të forumit rinor, kam qenë drejtuese për rininë në gjithë qarkun e Elbasanit. Kam dhënë dorëheqjen nga postet drejtuese në PD, por jam anëtare. Nuk di të jetë marrë ndonjë vendim për përjashtimin tim nga PD”, tha Balliu.
Ajo bëri edhe një kritikë të drejtpërdrejtë ndaj Sali Berishës, duke deklaruar se Partia Demokratike ka nevojë për një brez të ri drejtuesish.
“Koha e Sali Berishës ka përfunduar. Nuk mendoj që një person 81 vjeç mund të ecë me ritmin e kohës dhe padyshim nuk e shoh të arsyeshme. Mosha biologjike nuk e lejon Berishën ta bëjë PD një parti fituese”, u shpreh ajo.
Sipas Balliut, Partia Demokratike ka nevojë për rinovim dhe për figura të reja që të rikthejnë besimin e demokratëve.
“Jam një vajzë e re, e pakorruptuar dhe kam qenë një zë kritik. Kam avantazh atë që kërkojnë sot demokratët dhe qytetarët: rinovimin dhe figurat e reja në PD”, tha ajo.
