Deputetja e Partisë Demokratike, Albana Vokshi, ka reaguar pas situatës së krijuar një ditë më parë në Parlament, ku kryetari i grupit parlamentar të PS, Taulant Balla, përdori gjuhë ofenduese ndaj saj, duke i thënë: “për ty Albana kam numrin 0900”.
Sipas Vokshit, gjuha që u përdor ndaj saj ishte seksiste, ndërsa u shpreh se u ndje e lënduar nga situata e krijuar.
Duke folur në Komisionin e Jashtëm, deputetja demokrate deklaroi se dhuna verbale dhe psikologjike nuk ka vend në Parlament dhe kritikoi mënyrën se si kryetari i Kuvendit e menaxhoi situatën.
“Dhuna verbale, psikologjike nuk ka vend në parlament. Nuk jam ndjerë e fyer nga ajo që u tha dje nga kryetari i grupit tuaj parlamentar, sepse njerëz me veprime si të tij e turpërojnë parlamentin, por jam ndjerë e lënduar për mënyrën si kryetari i Kuvendit e menaxhoi situatën. Për mendimin tim e menaxhoi në mënyrë të turpshme dhe me mos distancimin nga ana e grave deputete socialiste për atë që u tha në foltore, për gjuhën seksiste që u përdor nga kryetari i grupit parlamentar të PS. Unë kam bindjen se shenjëstrimi ishte politik, nuk ishte i rastësishëm. Shenjestrimi ishte i qëllimshëm, po tentojnë të godasin opozitën dhe gratë deputete të opozitës”, tha Vokshi.
Ajo u ndal edhe te ndjesa e Taulant Ballës, të cilën e cilësoi si “fake”, duke thënë se në këtë rast u përdor edhe Bashkimi Evropian.
“Përdori edhe BE për një ndjesë fake, mashtrim. Më kanë kërcënuar dhe shantazhuar mua dhe koleget e mia. Më kanë dërguar në SPAK mua dhe familjen time. Më kanë përjashtuar tre muaj së fundmi duke më hequr të drejtën e përfaqësimit, pse? Sepse kërkova heqjen e imunitetit të Belinda Ballukut, sepse ajo është modeli i grave që i jepni ju qytetarëve”, u shpreh deputetja demokrate.
