Akti normativ për ndryshimet në buxhet u bë shkak për debat edhe brenda radhëve të Partisë Socialiste në seancën e sotme të Kuvendit. Deputeti Erion Braçe u shpreh se propozimet e tij për transferimin e një pjese të fondeve të pashpenzuara tek bujqit, të cilat ishin rrëzuar disa javë më parë, u paraqitën sërish përmes aktit normativ.
Me ironi, Braçe pyeti kryetarin e grupit parlamentar të PS-së, Taulant Balla, nëse këtë herë duhet të votohej pro apo kundër, duke theksuar se propozimi i tij ishte identik me atë të rrëzuarin më parë.
Nga ana e tij, Balla theksoi se aktet normative ose miratohen, ose rrëzohen, pa ndryshime, duke iu referuar kërkesës së Braçes për kompensimet për fermerët dhe bujqit për dëmet nga përmbytjet. Braçe sqaroi se nuk kishte kërkuar ndryshim, por vetëm informacion mbi mënyrën e votimit.
“Nuk bëra kërkesë për ndryshim të aktit normativ. Thashë vetëm që amendamenti i rrëzuar katër javë më parë sot është sjellë me akt normativ. Pyetja ime ishte se si duhet të votoj: pro apo kundër,” u shpreh Braçe.
Deputeti socialist kritkoi gjithashtu fondet që shkojnë për Komitetin Olimpik Shqiptar, duke theksuar se ky institucion nuk prodhon rezultate konkrete. Braçe nuk kurseu ironinë, duke theksuar se futbolli si sporti më masiv në Shqipëri po jep shpirt, ndërsa mazhoranca vazhdon të mbështesë sporte që janë pothuajse të panjohura si padeli apo ping-pongu.
“Tani 2.2 milionë euro për kuota pjesëmarrjeje në aktivitete, më vjen keq, por janë shumë para. Po ashtu, fondet që shkojnë te Komiteti Olimpik duhet të fillojnë të prodhojnë rezultate. Nëse duam të mbështesim sportin, le të mbështesim sportet masive, si futbolli, dhe jo padelin ose ping pongun,” deklaroi Braçe.
