Ministria e Ekonomisë, Kulturës dhe Inovacionit (MEKI) ka reaguar zyrtarisht sot ndaj pretendimeve të ngritura nga shoqëria “Fokus Media News”, e cila ka deklaruar se zotëron një kontratë qiraje të vlefshme deri në vitin 2033 mbi një pasuri shtetërore.
Në një deklaratë për shtyp, MEKI sqaron se pretendimi i shoqërisë lidhet me një pasuri tjetër, e ndryshme dhe pa asnjë lidhje juridike apo faktike me pronën që i është kaluar shoqërisë shtetërore “KAYO” sh.a. me vendim të Këshillit të Ministrave nr. 158, datë 12.3.2025.
Sipas Ministrisë, pasuria për të cilën “Fokus Media News” pretendon të ketë të drejtë përdorimi është një truall me sipërfaqe 13,922 m², në zonën kadastrale nr. 8170, pranë ish-Uzinës së Pjesëve të Këmbimit të Automjeteve në Shkozë. Kjo pasuri është objekt i një tjetër kontrate qiraje, të lidhur në vitin 2013 dhe të ndryshuar në vitin 2016, ndërmjet Ministrisë dhe shoqërisë “Panorama Group” sh.a., me afat deri në vitin 2033.
Ndërkohë, pasuria e kaluar “KAYO” sh.a. ka qenë më parë me kontratë qiraje të lidhur në vitin 2002, me afat deri në vitin 2022, dhe ka qenë objekt i vendimeve gjyqësore të formës së prerë që kanë pasur palë shoqërinë “Fokus Media News”.
“Kontrata e pretenduar si e vlefshme deri në vitin 2033 i përket një prone tjetër, me numër dhe kufij të ndryshëm. Çdo përpjekje për të paraqitur këto pasuri si të njëjta është dizinformim i pastër,” thuhet në deklaratë, duke theksuar se ky keqinformim është i pajustifikueshëm, pavarësisht interesave të mundshme materiale.
Ministria thekson se pasuria në fjalë është regjistruar si një njësi pronësore e veçantë dhe nuk ka asnjë lidhje me kontrata të tjera qiraje. Ajo rikonfirmon se veprimet për marrjen në posedim faktik të pronës janë në përputhje të plotë me ligjin dhe vendimet e gjykatës.
“Janë dy prona, dy kontrata krejtësisht të ndryshme dhe asnjë element i kontratës së vitit 2013 nuk ka ndikim mbi vlefshmërinë e vendimeve gjyqësore që kërkojnë lirimin e pasurisë së kaluar ‘KAYO’ sh.a.,” përfundon deklarata.
MEKI nënvizon se mbetet e hapur për çdo sqarim të mëtejshëm në interes të transparencës dhe informimit të saktë të publikut.
