Teksa në Tiranë, godinat e mediave News 24 dhe Panorama Group, vijojnë të jenë nën kontroll nga forcat e rendit, kryeministri Edi Rama ka thyer heshtjen, përmes postimit të një videoje nga prishja e një ndërtese bosh në Vlorë. Në të parin reagim të kreut të qeverisë, lexohet qartazi "kërcënimi" për këdo që del jashtë rreshti. Ndër të tjera Rama shkruan se është i vendosur për të luftuar paligjshmërinë dhe për këtë thotë se do t'a bëjë ndaj kujtdo, qoftë ky i madh apo i vogël. Dhe në vijim, me siguri nga shtatori, kreu i qeverisë kujtohet të paralajmërojë një paketë masash të reja.
Statusi
Kjo video është për ata që kanë merakun e gabuar se s’po ndëshkohen shkelësit e mëdhenj, si edhe për të ritheksuar faktin që kjo ngrehinë këtu nuk është as e pari e as e fundit që rrafshohet për paligjshmëri, ndërkohë që të tjera procese sekuestrimesh po bëhen në Vlorë e jo vetëm, për shkelje brutale të lejeve të ndërtimit.
Njëkohësisht pakoja e re e masave që do të miratojmë së shpejti do të jetë një mesazh i qartë për të gjithë, ata që shkelin ligjin duke lënduar mjedisin e përbashkët po edhe ata që mbyllin sytë përpara shkelësve.
