Gjatë një ndërhyrjeje telefonike në emisionin e mbrëmjes në Syri TV, ish-zv.kryeministri Arben Ahmetaj reagoi ndaj akuzës së re të SPAK, e cila u shtua sot në seancën gjyqësore mbi çështjen “Fabrika Buka”, ku prokuroria pretendon një transfertë prej 3 milionë eurosh të tij nga Shqipëria drejt Austrisë.
Në vend që të komentonte akuzën, Ahmetaj, nga Zvicra ku ndodhet në arrati, goditi drejtpërdrejt kreun e SPAK, Altin Dumanin.Sipas tij, në vend që të hetojë krimin e organizuar “nga A-ja te Zh-ja”, SPAK po kryen një “genocid kundër familjes” së tij. “E kanë menduar ndonjëherë këta kur shkojnë në shtëpi, që kanë shkatërruar jetë pa të drejtë?” pyeti ai, duke lënë të kuptohet se është duke u përndjekur padrejtësisht.
Sipas tij, “Dumani nuk mund të thotë se heton banda të rrezikshme dhe të dalë në tribunën VIP të stadiumit me familjen.”
Ai shtoi se kjo sjellje ngre pikëpyetje të qarta mbi mënyrën se si drejtuesit e SPAK sigurojnë biletat e shtrenjta dhe mbi imazhin publik që përcjell institucioni, teksa prokurorët shfaqen të relaksuar në evente luksoze “ndërkohë që pretendojnë luftë totale ndaj krimit dhe korrupsionit”.
Ahmetaj, nga arratia në Zvicër artikuloi idenë se shfaqjet publike të drejtuesve të SPAK dhe goditjet ndaj tij e familjes së tij “janë dy anë të së njëjtës medalje”: një sistem që, sipas tij, reagon ndaj kujtdo që “i prish rehatinë”.
