Ish-zëvendëskryeministri, Arben Ahmetaj, reagoi për deklaratat e kryeministrit Edi Rama në mbledhjen e grupit parlamentar të PS, ku ndër të tjera përmendi edhe rastin e tij si dosje me “1001 të zeza”.
Përmes një postimi në Facebook, Ahmetaj theksoi se çështja nuk ka hyrë ende në gjykim dhe hetimet sapo janë mbyllur, ndërsa i cilësoi komentete e Ramës si një shkelje të hapur të parimit themelor të prezumimit të pafajësisë.
Ai vuri në dukje paradoksin e situatës, duke theksuar se Kryeministri jep leksione për prezumimin e pafajësisë, ndërkohë që vetë nuk heziton ta shkelë këtë parim sa herë i intereson politikisht. Prezumimi i pafajësisë, sipas Ahmetajt, është një e drejtë themelore e garantuar nga Kushtetuta e Republikës së Shqipërisë, legjislacioni në fuqi dhe kartat ndërkombëtare për të drejtat e njeriut.
Ish-zëvendëskryeministri shtoi se e drejta e lirisë së shprehjes për këdo, përfshirë Kryeministrin, nuk mund të përdoret për të cenuar prezumimin e pafajësisë dhe as për të ushtruar presion apo ndikim mbi vendimmarrjen e organeve të drejtësisë.
Kujtojmë që Arben Ahmetaj është shpallur në kërkim nga Prokuroria e Posaçme prej muajit korrik të vitit 2023, ndërkohë që organi akuzës ka vendosur në sekuestro disa prona në emër të tij dhe familjarëve të tij.
