Pasi i propozoi opozitës formulën deri më tani të pasuksesshme të një kandidati jashtë partive politike për Tiranën, Agron Shehaj ka shtuar sot një tjetër alternativë. Sipas tij, për të fituar Tiranën, opozitës i duhet edhe një sondazh, pasi janë bërë disa kandidatë të pavarur që duan të kandidojnë me mbështetjen e partive opozitare.
“Unë i kam bërë propozim edhe partive opozitare që duan të mbështesin një kandidat jashtë partive politike, të gjithë bashkë të pajtojnë një kompani të huaj perëndimore e cila brenda pak ditësh mund të na thotë se cila mund të jetë fituesja. Brenda dy ditëve besoj se mund të dalin përfundimet e sondazhit. Fushata do të zgjasë pak javë. Sondazhi profesional do të jetë mënyra më e mirë për të marrë vendimin për kandidatin më të mirë,” tha Shehaj në një intervistë televizive.
Kur kanë mbetur pak më shumë se 30 ditë nga zgjedhjet për Bashkinë e Tiranës, opozita ende nuk ka rënë dakord për një emër mes 4-5 kandidatëve të vetëofruar. Kjo kakofoni emrash sigurisht që nuk e ndihmon opozitën në garën e pabarabartë për kryeqytetin. Por përtej kësaj, pyetja që lind pas propozimit për sondazh të zotit Shehaj është: vërtet e ka kuptuar që PD dhe Sali Berisha nuk duan një kandidat që nuk e kanë nën kontroll? Apo i thotë këto thjesht për të dalë në TV?
