Zgjedhjet e reja për bashkinë e Tiranës, Agron Shehaj i sheh si një shans për të mundur Ramën. Pas pushimeve të gjata verore, deputeti i partisë Mundësia ka bërë llogari me laps e letër se si opozita mund të fitojë zgjedhjet për Tiranën.
“Sot ne kemi Partinë Socialiste që në zgjedhjet e fundit në Bashkinë e Tiranës ka marrë rreth 49% të votave. Ka pothuajse shumicën. Partia Demokratike në opozitë ka rreth 32% të votave. Pas PD-së jemi ne, Mundësia me rreth 6% të votave. Dhe pastaj me radhë 3%, 3%, e kështu me radhë.
Tani, nëse PD vendos të kandidojë një anëtar të PD-së, një përfaqësues të PD-së, diferenca dhe shanset që PD-ja të fitojë janë 49% me 32%. Është pothuajse e pamundur! E vetmja mundësi që ka opozita është që e gjithë opozita të gjejë një emër që i bashkon. Një emër të jashtëm. Jo një anëtar të PD-së. Jo një anëtar të Partisë Mundësia apo të partive të tjera. Por një emër që gëzon respektin e shoqërisë, që është i papërfolur, që është i papërlyer, që ka treguar në jetë që ka bërë diçka. Dhe vetëm me një kandidat të tillë, me një kandidat të shkëlqyer, ne mund të fitojmë kundër Partisë Socialiste.” – u shpreh Shehaj.
Por kaq vite në parlament dhe në politikë nuk e kanë ndihmuar Agron Shehajn të kuptojë se politika (sidomos në Shqipëri) nuk është matematikë, por është pazar që ndryshe në publik thuhet “marrëveshje”. PD dhe opozita janë sot në ditën më të keqe, jo se s’kanë makina llogaritëse për të bërë hesap se sa vota duhen dhe si mund të maksimizohen votat. E vërteta është se pazaret politike dhe komoditeti i të qenurit në opozitë janë faktorët që e mbajnë peng rrotacionin.
