Deklaratat e mbrëmshme të drejtuesve të Partisë Demokratike kanë nxjerrë në pah dy versione të ndryshme mbi arsyet e sulmit me molotov ndaj ish-vilës së Enver Hoxha.
Kryetari i PD, Sali Berisha, deklaroi se protestuesit u “mashtruan” nga agjentë të infiltruar të policisë kriminale, të cilët – sipas tij – përhapën lajmin se në atë banesë jetonte kryeministri Edi Rama. “E gjithë beteja ishte shpërthim urrejtje ndaj Edi Ramës dhe jo ndaj ndërtesave”, u shpreh Berisha, duke shtuar se Rama banon në Surrel ose tek vila e Mehmet Shehut.
Nga ana tjetër, kreu i grupit parlamentar të PD, Gazment Bardhi, dha një tjetër arsyetim. Ai deklaroi se godina shërben si vend ku, sipas tij, Rama “mbyll pazaret me krimin” dhe njëkohësisht është simbol i diktaturës. Bardhi e cilësoi reagimin si “revoltë të qytetarëve” ndaj rikthimit të “nuancave të atij regjimi” 35 vite pas rënies së tij.
Dy qëndrimet lënë hapësirë për interpretim: nëse sulmi ndodhi si pasojë e një dezinformimi nga “agjentë të infiltruar”, apo si një akt i ndërgjegjshëm kundër një simboli të komunizmit dhe, sipas PD, kundër vetë kryeministrit.
Ish-vila e diktatorit ka qëndruar në këmbë për më shumë se tre dekada në mes të Tiranës. Pyetja që shtrohet është pse simboli u kujtua pikërisht tani – dhe cili është motivi real që qëndron pas asaj që ndodhi.
