Kryeministri, Edi Rama, duket se ka marrë në mbrojtje edhe drejtoreshën e AKSHI-t, Mirlinda Karçanaj, e cila është nën hetim nga SPAK për shpërdorim me tenderat publik dhe skandalet që lidhen me këtë institucion.
Në podcastin “Flasim”, Rama tha se Karçanaj udhëhoqi jetësimin e vizionit tonë qeverisës transfomimin digjital të qeverisë me dije, me vullnet e përkushtim të përditshëm për 12 vite. Kryeministri nënvizoi se Karçanai ndodhet aktualisht nën një masë sigurie për një akuzë të rëndë, por theksoi se e vërteta mund të dalë vetëm nga drejtësia dhe jo nga “700 tenxheret e çorbës politike dhe mediatike”.
“E di që sot AKSHI përballet me një hetim nga SPAKU për përdorimin e fondeve dhe Linda Karçanaj, gruaja që ka udhëhequr jetësimin e vizionit tonë qeverisës, për transformimin historik digjital te qeverisjes se Shqiperise, me dije, vullnet e përkushtim të përditshëm për 12 vjet me radhë, gjendet nën nje mase sigurie me një akuze te hatashme, për të cilën duhet pritur me durim vetëm nga drejtësia, e s’mund të pritet asgjë nga 700 tenxheret e çorbës politike mediatike, që të dalë deri në fund e vërteta e saj ciladoqoftë ajo”, tha ai.
Ndonëse është bërë pengesë për hetimet e SPAK ndaj zëvendëskryemnistres Balluku, Rama vijon të mbështesë me fjalë drejtësinë duke thënë se është garant i saj.
“Ne do të vazhdojmë të luftojmë për drejtesinë që i ka munguar këtij shteti qysh në lindjen e tij, 100 e kusur vjet më parë. Ne do të vazhdojmë të mbështesim organet e drejtësisë me gjithçka kemi në dorë për të bërë detyrën e tyre dhe do të mbetemi garantët e palëkundur të Reformës në Drejtës”, tha Rama.
Në një kohë kur qeveria e tij ndodhet nën akuza për korrupsion me tenderat publikë dhe nën hetim nga SPAK, kryemnistri Edi Rama, ka zgjedhur të shfryj ndaj mediave. Duke i quajtur “tenxhere mediatike histerike”, ai tha se aty zihet llumi i gënjeshtarave të mëdha.
