Në Kolegjin Zgjedhor po zhvillohet një seancë që, po të mos ishte reale, do të dukej si një skeç humoristik. Adriatik Lapaj, i cili në fillim pretendonte mandatin e vetëm të koalicionit “Nisma Shqipëria Bëhet” për vete, papritur ka ndryshuar mendje: nuk e do më. Tani kërkon që mandati t’i mbetet gocës së tezes së tij, Kleana Xhuveli, dhe jo Ana Dajkos, të cilës KAS-i ia kishte dhënë sipas radhës së listës.
Pra, nga “unë jam i votuari i qytetarëve” Lapaj kaloi tek “më mirë le ta mbajë goca e tezes”. Në ankimimin e 4 gushtit ai këmbëngulte që të shpallej fitues me votat preferenciale, duke mos njohur si të vlefshme revokimin e dorëheqjeve nga Zeqir Kordhoni (daja i Endri Shabanit) dhe vetë goca e tezes, Xhuveli. Të dy, sipas marrëveshjes së koalicionit, kishin rënë dakord që të dorëzonin mandatin, në mënyrë që në parlament të hynte më i votuari. Por sapo Kordhoni u kujtua që nuk mbante mend firmën e dorëheqjes, rruga e Lapajt drejt Kuvendit u bllokua.
