Klodian Braho pritet të jetë kreu i ri i SPAK. Duhet pranuar që të katër kandidaturat, që do kalojnë sot më shumë në filtrin e ndërkombëtarëve se në atë të KLP-së, tashmë e kanë të preferuarin e tyre. Braho e ka marrë kryesisht “bekimin” e amerikanëve, jo për faktin se bën diferencë profesionale apo për arsye të tjera me tre kolegët e tjerë.
Ndryshe nga tre vite më parë, kur Yuri Kim iu desh të merrte frenat në dorë për shkak të ekuilibrave politike të kandidatëve për të drejtuar SPAK, këtë herë duket se kriteri është ai krahinor dhe ndoshta pak ai gjinor. Ndërsa SHBA kanë qenë të dyzuar mes Klodian Brahos dhe Adnan Xholit, duket se ky i fundit ka “humbur terren” për shkak të origjinës nga Dibra. Jo rrallëherë segmente të qeverisë kanë artikuluar “çeta e Dibrës”, duke iu referuar zonës nga vijnë Altin Dumani, Adnan Xholi dhe ish-ministra të Edi Ramës.
Ndërkohë, përfaqësues të BE-së kanë këmbëngulur në zgjedhjet e tyre për kreun e SPAK që të jetë një grua, në këtë rast Doloreza Musabelliu. Një prokurore me integritet dhe e zonja, por mesa duket shanset më të mëdha këtë herë i ka Klodian Braho.
Procesi pritet të nisë këtë të enjte në orën 9 të mëngjesit, ndërsa interesi është i madh. Në sallën ku do të zhvillohen intervistat me kandidatët nuk ka vend për media, pasi do të ketë përfaqësues të trupit diplomatik. Katër kandidatët për kreun e SPAK janë Adnan Xholi, Doloreza Musabelliu, Klodian Braho dhe Elvin Gokaj, të cilët kanë dorëzuar zyrtarisht kandidimin e tyre për të drejtuar Prokurorinë e Posaçme.
