Opinion nga Ergys Mërtiri
Politikanë dhe analistë anti-SPAK kanë ngritur vazhdimisht alarmin se kjo prokurori ka të drejtë të përgjojë gjykatësit. Sipas tyre kjo është shkatërruese sepse cënon pavarësinë e gjyqësorit dhe i jep mundësinë SPAK-ut të marrë peng gjykatësit.
Altin Dumani u përgjigj fare qartë se ligji i lejon SPAK-ut të përgjojë vetëm në kuadër të një hetimi penal dhe vetëm nëse ka një leje nga gjykata për këtë. Pra prokurori nuk mund të bëjë siç ia ka qefi për të përdorur përgjimin si mjet shantazhi, por i duhet të ketë lejë për ta bërë këtë, e cila kërkon prova paraprake.
Sipas zërave anti-SPAK, i bie që gjykatësit të jenë të papërgjueshëm, sepse përndryshe ata u bëkan të shantazhueshëm nga prokuroria. Sipas tyre, gjykatësi mund të jetë i korruptueshëm nga të hetuarit, por jo i shantazhueshëm nga ligji.
Pyetja shtrohet, çfarë duhet bërë kur një gjykatës bën korrupsion? Natyrisht që duhet të hetohet.
Kush do ta hetojë? Natyrisht që prokuroria. Por si mund të hetojë prokuroria pa mbledhur prova dhe pa vënë në përgjim të dyshuarin?
Sigurisht që edhe prokuroria mund të abuzojë dhe për këtë arsye, ligji ka vendosur një çek, që është gjykata. Për të vënë në përgjim një gjykatës, ashtu si këdo tjetër, prokurorisë i duhet të marrë leje në gjykatë dhe kjo është gjëja më normale në botë.
Cili i bie të jetë propozimi i avokatëve të gjykatësve? Ta bëjmë gjykatësin të pahetueshëm dhe të paprekshëm nga ligji, në mënyrë që kushdo ta korruptojë lehtësisht sa herë ti duhet?
Këto akuza ndaj SPAK-ut mund ti bëjnë vetëm ata që nuk duan një drejtësi që ka fuqinë të ndëshkojë politikën. Në pamundësi për të penguar SPAK-un të hetojë, me gjithë presionet e forta, ata kërkojnë një gjykatë që të rrëzojë SPAK-un dhe të mbrojë abuzuesit. Akuza të tilla vërshojnë çdo ditë nëpër media nga ata që duan ta shkatërrojnë të vetmen gjë pozitive që i ka ndodhur këtij vendi kë këta vjet. Prandaj ky vend nuk del dot nga bataku i këtyre 35 viteve. Sepse ka shumë njerëz që luftojnë të shkatërrojnë çdo mundësi për të dalë prej tij.
