Nga Esiona Konomi
Pijeni me qetësi cigaren në paradhomat e komisioneve, por kini kujdes inspektorët e shëndetësisë, e mos u shqetësoni aq shumë se u dekriminalizua shpifja.
Rrini të qetë, “se nuk na jepni zemër t’ju shajmë” me votën e sotme, sepse ky qëllim nuk ekziston mes gazetarëve profesionistë.
Ju nuk e hoqët shpifjen si vepër penale.
Ajo ngelet e tillë për çdo qytetar të vendit, përfshi edhe gazetarët.
Po, po, edhe për gazetarët.
Sepse ligji që miratuat ju, “fal” vetëm ata gazetarë që janë të regjistruar.
Po ku? Profesioni nuk është i vetërregulluar. Bazë ligjore nuk ka që i jep jetë ligjit që miratuat ju. Pra, përpara gjykatës jo të gjithë mund të provojnë bindshëm se janë gazetarë.
Ju e “falni” gazetarin nëse ai plotëson disa kushte:
a) kur qëllimi kryesor është informimi i publikut
b) kur ka bërë përpjekje të arsyeshme për të verifikuar saktësinë e tyre
c) kur bën një përgënjeshtrim pasi kontaktohet nga të prekurit
Më falni, por me ç’bazë një prokuror e një gjykatë do të verifikojë që këto kritere janë plotësuar?
Thatë se jeni tërësisht në përputhje me Bashkimin Evropian. Gënjeshtër. Komisioni ka kërkuar heqjen totale, për të gjithë, të shpifjes nga Kodi Penal, pa kategori, pa kushte.
Ju rikujtoj edhe një herë, se sa herë ndiheni se jeni subjekt i shpifjeve, keni në dispozicion gjykatën civile për padi të tillë.
