Opinion nga Muriel
Në korridoret e pushtetit në Tiranë po luhet një akt i rrezikshëm që mund të përcaktojë xhepat e shqiptarëve për dekadën e ardhshme. Banka e Shqipërisë, institucioni që duhet të jetë kështjella e stabilitetit financiar, po trajtohet si një “menu” ku oligarkët dhe politika zgjedhin njerëzit e tyre. Nuk është thjesht një procedurë emërimi; është një operacion për të zhvendosur sovranitetin monetar drejt klaneve që kontrollojnë paratë dhe ndërtimin në vend.
Në qendër të këtij skandali qëndron një ndarje e qartë e zonave të ndikimit mes dy vatrave lobimi, me bekimin e Edi Ramës:
a) Propozimet e Kryeministrit
Këta janë emra që Rama i dërgon drejtpërdrejt në Kuvend. Burime të sigurta tregojnë se pas tyre qëndron një biznes i afërt me rrethin e tij familjar. Synimi i këtij grupi është ta kthejë Këshillin Mbikëqyrës në një mburojë private për të garantuar paprekshmërinë e monopoleve.
b) Vendet e Kuvendit
Këtu po zhvillohet teatri i “garës”. Rreth 20 kandidatë kanë aplikuar për tre vende, por gjithçka duket e paracaktuar. Një tjetër biznesmen i madh po ushtron presion mbi deputetët për të zgjedhur “besnikët” e tij, ndërkohë që ka siguruar tashmë ndikim mbi Guvernatorin përmes punësimit të bashkëshortes së tij në Tirana Bank.
Hapja dhe mbyllja e aplikimeve gjatë festave të fundvitit 2025 ishte një operacion i shpejtë dhe i planifikuar. Lista e kandidatëve tregon një realitet të hidhur: shumica kanë qenë të gatshëm t’u shërbejnë interesave të oligarkëve, politikës ose vetë Kryeministrit. Nuk po kërkohen profesionistë të pavarur, por njerëz besnikë ndaj pushtetit ekonomik.
Në vitin 2025, Kuvendi pranoi një absurd procedural: aplikimet nuk lejoheshin të dërgoheshin me postë zyrtare, por vetëm dorazi. Ky detyrim krijoi hapësirë që sekserët e pushtetit të kontrollonin çdo dosje përpara protokollimit, duke penguar këdo që nuk ishte pjesë e rrethit të interesave.
Përballë këtij pazari, mbetet vetëm një rrugë: anulimi i menjëhershëm i procesit dhe rihapja e garës me transparencë totale. Deputetët kanë detyrim moral dhe kushtetues të mos e lejojnë këtë kapje të institucionit më të rëndësishëm financiar të vendit.
Kuvendi nuk mund të kthehet në zyrë noterie për oligarkinë. Çdo deputet që voton emra të paracaktuar po voton kundër interesit publik. Gara duhet të rihapet, aplikimet të bëhen digjitale dhe publike, dhe të ftohen ekspertët më të mirë të fushës.
SPAK duhet të hetojë procedurën e dorëzimit të dosjeve dhe lidhjet mes politikës dhe biznesit të madh. Banka e Shqipërisë nuk është dyqan i oligarkëve. Nëse ky bord mbërthen sot interesat e mafies, koston do ta paguajnë shqiptarët përmes pastrimit të parave dhe rritjes së kostos së jetesës për vite me radhë.
