Nga Sidorela Vatnikaj
Institucioni i Avokatit të Popullit prej vitesh ka mbetur peng i pazareve politike mes mazhorancës dhe opozitës, duke humbur funksionin e tij bazë: mbrojtjen e qytetarëve dhe të interesit publik. Ky bllokim i qëllimshëm ka prodhuar si rezultat një institucion të dobësuar, të përdorur si fasadë dhe jo si mekanizëm kontrolli ndaj abuzimeve të pushtetit.
Megjithatë, në listën e emrave të propozuar për Avokat të Popullit ka një figurë që do t’i bënte nder çdo institucioni, që përfaqëson transparencë, integritet dhe punë të palodhur për interesin publik: Arianita Brahajn. Si gazetare dhe themeluese e Open Data Albania, platformës së parë që ka dokumentuar në mënyrë sistematike tenderat publikë, Arianita ka bërë atë që institucionet nuk kanë dashur ta bëjnë, duke zbardhur me fakte lidhjet mes korrupsionit politik dhe kompanive private që përfitojnë miliona nga paratë e qytetarëve.
Open Data ka qenë një mjet kyç për mua, për aktivistë, gazetarë dhe publikun e gjerë, për të provuar atë që dihej. Nëpërmjet kësaj platforme, punës së Arianitës dhe grupit, kemi faktuar në raste të ndryshme sesi pushtetarët kanë ngritur pasuri përmes abuzimit me fondet publike. Rasti më ekstrem mbetet ai i kompanisë 5D në procesin e rindërtimit.
Kontributi i Arianitës, i qëndrueshëm dhe i pakompromis, është arsyeja pse besoj se ajo, si Avokate e Popullit, do të vendoste gjithmonë interesin publik në vend të parë. Ka ardhur koha që ky institucion të mos përdoret më si strehë për militantë apo si zyrë shërbimi për politikën. (Le të kujtojmë edhe takimin e turpshëm të Erion Veliajt dhe kryetares së Komisionit të Ligjeve me Avokaten e Popullit në zyrën e saj, në një moment kur Veliaj ishte nën hetim, një presion i qartë politik mbi një institucion që duhet të jetë i pavarur.)
Ka ardhur koha që Avokati i Popullit të mos jetë më një titull bosh, por një pozicion me forcë reale, me zë të qartë dhe me përgjegjësi të vërtetë për qytetarët.
Për këtë arsye, unë mbështes Arianita Brahajn për Avokate të Popullit, për një institucion që i shërben popullit dhe jo politikës.
