Në Pogradec janë zhvilluar sot homazhe në nder të efektivit të Policisë së Shtetit, Enea Mekolli, i cili humbi jetën në krye të detyrës gjatë një aksioni policor.
Ceremonia është shoqëruar me momente të forta emocionale, ku familjarët e të ndjerit kanë shpërthyer në dhimbje dhe kanë kërkuar përgjegjësi për ngjarjen. Gjatë homazheve, një prej familjarëve, xhaxhai i 36-vjeçarit, i është drejtuar presidentit Bajram Begaj duke kërkuar më shumë masa dhe siguri për punonjësit e rendit dhe qytetarët, ndërsa ka shprehur shqetësimin se krimi i organizuar po vijon të marrë jetë të pafajshme.
“E latë këtë vend në dorë të krimineleve. Na mbylli derën, mos i lini kriminelet. Ka patur tre herë tentativë për ta arrestuar, duhet të merrni masa, po na vrisni, bëhuni te zotë, e late këtë vend në dorë të krimineleve, po sundojnë kriminelet në çdo cep të Shqipërisë. Nuk dominion policia por dominon krimi. Na fundoset. Na çuat në fund. Nuk kishte masa mbrojtëse.”, tha xhaxhai, ndërsa Begaj nuk ka bërë asnjë reagim, por e ka përqafuar.
