Jose Mourinho mund të rikthehet sërish në stolin e Real Madrid dhe mediat spanjolle raportojnë se portugezi ka nisur të planifikojë revolucionin në skuadër.
Sipas raportimeve, Mourinho ka zhvilluar bisedime me presidentin Florentino Perez për të marrë drejtimin e ekipit sezonin e ardhshëm, pas vendimit të trajnerit aktual Alvaro Arbeloa për t’u larguar në fund të sezonit.
Mediumi spanjoll “Esdario” shkruan se tekniku portugez ka vendosur kushte të forta për rikthimin në “Santiago Bernabeu”, duke kërkuar kontroll të plotë mbi skuadrën dhe vendimet sportive.
Në listën e lojtarëve që mund të largohen përfshihen emra si Andriy Lunin, Fran Garcia, Ferland Mendy, Dani Ceballos dhe Gonzalo Garcia, të cilët nuk kanë pasur shumë hapësira gjatë këtij sezoni.
Raportohet gjithashtu se edhe Eduardo Camavinga mund të sakrifikohet në merkato, teksa për mesfushorin interesohen Manchester United dhe Liverpool.
Një tjetër emër surprizë në listën e largimeve është Federico Valverde, i cili aktualisht po rikuperohet nga një dëmtim i pësuar pas një incidenti në stërvitje me Aurelien Tchouameni.
Megjithatë, emri që ka shkaktuar më shumë bujë është ai i Vinicius Junior. Sulmuesi brazilian, që ka realizuar 22 gola dhe 10 asistime këtë sezon, ende nuk ka arritur marrëveshje për rinovimin e kontratës me klubin madrilen.
Sipas mediave portugeze, Vinicius ka refuzuar disa oferta rinovimi dhe me kontratën që i skadon verën e ardhshme, Real Madridi rrezikon ta humbasë falas nëse situata nuk zgjidhet brenda muajve të ardhshëm.
