Manchester City nuk duket i shqetësuar nga raportimet e fundit që kanë lidhur Erling Haalandin me një transferim të mundshëm te Real Madridi.
Sipas TEAMtalk, drejtuesit e klubit anglez mbeten të bindur se sulmuesi norvegjez do të vazhdojë të jetë pjesë e projektit të tyre dhe nuk kanë marrë asnjë sinjal që lojtari dëshiron të largohet nga “Etihad Stadium”.
Në raport thuhet gjithashtu se përfaqësuesit e Haalandit kanë mohuar pretendimet për ekzistencën e një marrëveshjeje paraprake me gjigantin spanjoll, duke zbehur spekulimet që kanë qarkulluar në ditët e fundit.
Megjithatë, mundësia e një aventure të ardhshme në La Liga nuk përjashtohet plotësisht. Real Madridi vazhdon të monitorojë situatën e një prej sulmuesve më të kërkuar në futbollin botëror, por aktualisht nuk ka asgjë konkrete sa i përket një transferimi të afërt.
Që nga mbërritja e tij te Manchester City, Haaland është shndërruar në një nga figurat më të rëndësishme të skuadrës, duke shënuar një numër të madh golash dhe duke kontribuar në fitimin e trofeve në Angli dhe në arenën evropiane.
Për momentin, të gjitha indiciet tregojnë se 25-vjeçari do të vijojë karrierën e tij te Manchester City, pavarësisht interesimit të vazhdueshëm nga klubet më të mëdha të kontinentit, përfshirë Real Madridin.
