Një seri studimesh shkencore po konfirmojnë gjithnjë e më shumë atë që shumë njerëz e kanë ndjerë intuitivisht: qëndrimi në natyrë ka efekte të fuqishme pozitive në shëndetin fizik dhe mendor.
Sipas ekspertëve, edhe një shëtitje e shkurtër prej rreth 20 minutash në park ose në një hapësirë të gjelbër mund të sjellë ndryshime të matshme në trup, duke ulur hormonet e stresit, përmirësuar presionin e gjakut dhe ndikuar pozitivisht në sistemin imunitar.
Kur një person ndodhet mes pemëve, dëgjon zogjtë ose ndien aromën e pyllit, sistemi nervor autonom aktivizohet në mënyrë të menjëhershme. Kjo sjell ulje të rrahjeve të zemrës dhe të tensionit të gjakut, duke krijuar një gjendje qetësie fiziologjike.
Një studim në Mbretërinë e Bashkuar me rreth 20 mijë pjesëmarrës tregoi se personat që kalonin të paktën 120 minuta në javë në natyrë raportuan shëndet më të mirë dhe mirëqenie më të lartë psikologjike.
Kalimi i kohës në natyrë ndikon gjithashtu në sistemin hormonal, duke ulur nivelin e kortizolit dhe adrenalinës dy hormone të lidhura ngushtë me stresin dhe ankthin.
Ekspertët theksojnë se edhe ekspozimi ndaj aromave natyrore, si ajo e pishave, mund të sjellë qetësim të shpejtë, madje brenda pak minutash.
Aromat e pemëve dhe tokës përmbajnë përbërës natyralë që mund të ndikojnë në sistemin nervor dhe madje të përthithen nga trupi. Studimet tregojnë se këto aroma mund të ulin stresin dhe të përmirësojnë gjendjen emocionale.
Përveç kësaj, kontakti me tokën dhe bimët ndihmon edhe mikrobiomën e zorrëve, duke futur baktere të dobishme që mbështesin sistemin imunitar dhe shëndetin e përgjithshëm.
Ekspertët theksojnë se nuk është e nevojshme të shkosh në pyll për ditë të tëra. Edhe elemente të thjeshta si lule në shtëpi, aromaterapia me vajra esencialë apo shikimi i imazheve të natyrës mund të ndihmojnë në uljen e stresit.
Sipas studiuesve, “çdo kontakt me natyrën ka efekt”, duke e bërë atë një mënyrë të thjeshtë dhe të arritshme për të përmirësuar shëndetin në jetën e përditshme.
