Turqia ka prezantuar rregullore të reja për përdorimin e rrjeteve sociale, duke synuar rritjen e mbrojtjes për fëmijët dhe përdoruesit e rinj në internet.
Sipas masave të reja, të miturit nën moshën 15 vjeç nuk do të lejohen të regjistrohen në platformat sociale. Kompanitë do të detyrohen të zbatojnë sisteme efektive për verifikimin e moshës, me qëllim parandalimin e aksesit të fëmijëve në këto shërbime.
Rregulloret parashikojnë gjithashtu që platformat të ofrojnë shërbime të diferencuara dhe të përshtatura për përdoruesit mbi 15 vjeç, duke rritur sigurinë dhe kontrollin mbi përmbajtjet.
Në kuadër të zbatimit, parashikohen mekanizma më të fortë të kontrollit prindëror, përfshirë mjete për menaxhimin e llogarive dhe kufizimin e kohës së përdorimit.
Kompanitë e rrjeteve sociale do të jenë gjithashtu të detyruara të ndërmarrin masa kundër reklamave mashtruese dhe për të reduktuar rreziqet online.
Ndërkohë, në raste urgjente që lidhen me sigurinë kombëtare, platformat e mëdha do të duhet të zbatojnë urdhrat për heqjen e përmbajtjeve brenda një ore.
