Me afrimin e verës, ndoshta shumë prej jush lexues do të kenë më shumë kohë të lirë për të kaluar me personin autik që njohin. Prandaj do të doja t’ju ofroja dhjetë këshilla për të përmirësuar marrëdhënien tuaj me persona autikë pak verbalë si unë. Natyrisht nuk janë këshilla vetëm për verën dhe mund të zbatohen edhe në stinë të tjera. Le të fillojmë.
Ne autikët nuk jemi njerëz të thyer dhe mbi të gjitha ju nuk jeni të ngarkuar të na “rregulloni”, duke na mësuar të sillemi si ju. Ne jemi shumë mirë, por jashtëzakonisht të ndryshëm nga ju në mënyrën si funksionon mendja jonë. Të gjesh një mënyrë për të ndërvepruar me ne, qoftë edhe pak, mund të jetë një aventurë emocionuese.
Mos u trishtoni apo, edhe më keq, mos u dëshpëroni për ne, sepse kjo na bind se autizmi ynë është një fatkeqësi. Kjo na lëndon dhe na shtyn drejt sjelljeve problematike, ndonjëherë edhe të dhunshme, që nuk kanë lidhje me vetë autizmin.
Ngadalësoni gjithçka. Ndonjëherë kuptojmë kaq pak nga bota juaj sepse thuhen, bëhen dhe ndodhin shumë gjëra dhe shumë shpejt.
Ulni ndikimin tuaj shqisor, duke shmangur përdorimin e pas-rrojës dhe parfumeve që janë si armë lufte nuhatëse, duke shmangur gjithashtu të bërtiturat, veshjet me ngjyra shumë të ndezura apo lëvizjet e vrullshme.
Reflektoni se nuk është e nevojshme të flitet gjithmonë. Mund të rrimë bashkë edhe duke bërë diçka pa thënë asgjë. Në këtë heshtje, herë pas here shikoni trupin tonë, sepse ne komunikojmë shumë në mënyrë joverbale dhe edhe ju e bëni këtë, por nëse flisni gjithmonë, vështirë se do të bëheni të vetëdijshëm për këtë.
Dijeni se ndonjëherë izolohemi sepse të qenit me të tjerët na pëlqen shumë, por edhe na lodh shumë. Prandaj, nëse izolohemi pak, mos na sulmoni me edhe më shumë komunikim.
Nëse na shfaqet një stereotipi, mos e shtypni menjëherë pa pyetur më parë veten nëse ka ndonjë mbingarkesë shqisore që e ka shkaktuar. Punoni mbi shkaqet, jo mbi pasojat.
Shumë autikëve u duhet më shumë kohë se juve për të kuptuar dhe mësuar të bëjnë gjëra. Mos u dekurajoni shumë shpejt, sepse pasi ta mësojmë, mund të bëhemi shumë të zotë dhe shpesh shumë të saktë.
Autizmi nuk është vetëm kufizim, por edhe talent. Kërkoni pasione dhe talente të mundshme tek personi juaj autik dhe, nëse i gjeni, vini veten në dispozicion për t’i kultivuar.
Shtrirë në plazh apo në një livadh mali, a e keni menduar që këtë verë mund të lexoni një libër që ju mëson diçka mbi autizmin? Mendoj se nuk do të pendoheni.
