Një nga pasojat anësore të luftës mund të jetë edhe nevoja për të “udhëtuar më lehtë”. Rritja e kostove të bagazheve dhe e biletave të avionit lidhet drejtpërdrejt me shtrenjtimin e karburantit të avionëve (jet fuel), i nxitur nga tensionet gjeopolitike. Për këtë arsye, shumë kompani ajrore – veçanërisht ato low-cost – mund të rrisin tarifat për bagazhet e dorës dhe ato të regjistruara për të kompensuar kostot e karburantit.
Ndër kompanitë që kanë nisur tashmë të rrisin çmimet është United Airlines. Këtë javë ajo u bë kompania e dytë që shtoi tarifat për bagazhet, duke e justifikuar vendimin me rritjen e çmimeve të karburantit për shkak të luftës në Iran. Sipas njoftimit të kompanisë, pasagjerët që fluturojnë brenda SHBA-së, si dhe drejt Meksikës, Kanadasë dhe Amerikës Latine do të paguajnë 10 dollarë më shumë për bagazhin e parë dhe të dytë të regjistruar, ndërsa për bagazhin e tretë tarifa rritet edhe me 50 dollarë. Nga kjo rritje përjashtohen udhëtarët në kabina premium, klientët me status “elite” dhe ata që përdorin kartat e kreditit të kompanisë.
Tendenca u nis në fund të marsit nga kompania JetBlue, e cila gjithashtu rriti tarifat për bagazhet. Çmimi për bagazhin e parë në fluturimet brenda SHBA-së është rritur me 4 dollarë, ndërsa në disa raste arrin deri në 59 dollarë, në varësi të datës së udhëtimit dhe momentit të pagesës.
Kompania theksoi se ndryshimet lidhen me rritjen e kostove operative. “Ne vlerësojmë rregullisht mënyrën se si t’i menaxhojmë këto kosto duke mbajtur konkurruese tarifat bazë dhe duke vazhduar të investojmë në përvojën e klientëve”, thuhet në deklaratën e saj.
Ndërkohë, ekspertët e udhëtimit këshillojnë pasagjerët të kontrollojnë gjithmonë dimensionet e bagazhit të dorës sipas rregullave të kompanisë ajrore për të shmangur tarifat shtesë në aeroport. Për të kursyer hapësirë në valixhe, rekomandohet përdorimi i organizatorëve ose “kubeve të kompresimit”, të cilat ndajnë rrobat sipas kategorive dhe reduktojnë ndjeshëm volumin e bagazhit.
