Në Ditën e Shën Valentinit rikthehet shpesh ideja romantike se diku ekziston “Ai/Ajo i duhuri” – personi perfekt me të cilin jemi të destinuar të jemi bashkë. Por studimet shkencore sugjerojnë se realiteti mund të jetë më kompleks.
Ideja e shpirtit binjak – nga mitet te kultura moderne
Koncepti i shpirtit binjak është i vjetër. Në Greqinë e lashtë, filozofi Plato përshkroi mitin se njerëzit dikur ishin qenie të plota, por u ndanë më dysh dhe kalojnë jetën duke kërkuar gjysmën tjetër.
Më vonë, në Mesjetë, historitë e dashurisë kalorësiake dhe legjendat arturiane për personazhe si Lancelot dhe Guinevere forcuan idenë e dashurisë së destinuar. Ndërsa në Rilindje, autorë si William Shakespeare folën për “të dashuruarit e shkruar në yje”.
Çfarë thotë shkenca moderne për “The One”
Sipas psikologut social Viren Swami nga Anglia Ruskin University, ideja moderne e dashurisë romantike lidhet me Evropën mesjetare, kur filloi të përhapet besimi se secili duhet të ketë një partner të vetëm për gjithë jetën.
Ndërkohë, profesori Jason Carroll nga Brigham Young University thotë se duhet bërë dallimi mes “shpirtit binjak” dhe një partneri që ndërtohet me kalimin e kohës. Sipas tij, marrëdhëniet e forta krijohen përmes përpjekjes, kompromisit dhe rritjes së përbashkët.
“Kurthi i shpirtit binjak”
Studimet tregojnë se njerëzit që besojnë se marrëdhëniet duhet të jenë perfekte dhe pa vështirësi janë më të prirur të heqin dorë pas konflikteve. Këto kërkime lidhen edhe me studimet e psikologut C. Raymond Knee nga University of Houston.
Kur “kimia” mund të jetë traumë, jo dashuri
Trajnerja e marrëdhënieve Vicki Pavitt paralajmëron se ndjenja e fortë e “kimisë” ndonjëherë mund të vijë nga modele të vjetra emocionale apo trauma. Studime të mëparshme nga psikologët Donald Duttondhe Susan Painter treguan se lidhjet më të forta emocionale shpesh krijohen në marrëdhënie ku partnerët alternojnë sjellje pozitive dhe negative.
A ekziston vetëm një partner perfekt?
Modele matematikore sugjerojnë se njerëzit mund të kenë shumë partnerë potencialisht të përshtatshëm, jo vetëm një. Studimi i ekonomistit Greg Leo nga Vanderbilt University sugjeron se shumica e njerëzve kanë disa partnerë me të cilët mund të ndërtojnë marrëdhënie të suksesshme.
Sekreti i marrëdhënieve të qëndrueshme
Sipas sociologes Jacqui Gabb nga The Open University, marrëdhëniet e forta nuk ndërtohen nga gjeste të mëdha romantike, por nga veprimet e vogla të përditshme – kujdesi, vëmendja dhe mbështetja emocionale.
Përfundimi: Dashuria ndërtohet, nuk gjendet gati
Shkenca nuk e shkatërron romantizmin, por sugjeron se marrëdhëniet më të forta krijohen nga dy njerëz që punojnë bashkë për t’i bërë ato të funksionojnë.
Ekspertët theksojnë se ideja e një personi të vetëm perfekt mund të jetë romantike, por në praktikë, lidhjet e suksesshme janë ato që ndërtohen me kohë, përpjekje dhe mirëkuptim.
