Edhe në natën më të rëndësishme të Hollywood-it, ceremonia e Academy Awards u shoqërua me mesazhe politike kundër policisë federale të emigracionit të mbështetur nga Donald Trump.
Pas protestave të shfaqura më herët në Golden Globe Awards, disa të famshëm u paraqitën edhe në Oscar me spila dhe slogane kundër agjencisë federale të emigracionit U.S. Immigration and Customs Enforcement. Simbolet “ICE OUT” dhe “Be Good” u përdorën nga artistë dhe aktivistë për të protestuar ndaj dhunës së pretenduar të agjentëve të emigracionit.
Një ditë para ceremonisë, organizatat që qëndrojnë pas kësaj fushate projektonin slogane në ndërtesa të ndryshme në Los Angeles, përfshirë Academy Museum of Motion Pictures dhe hotelin Loews Hollywood Hotel.
Mes personazheve që mbajtën këto simbole ishte kostumografja polake Malgosia Turzanska, e nominuar për filmin Hamnet të regjisores Chloé Zhao. Ndërkohë, autorja dhe aktivistja Glennon Doyle u shfaq me një çantë ku shkruhej “Fuck ICE”, teksa pozonte pranë futbollistes Abby Wambach, e cila mbante gjithashtu një spile “ICE OUT”.
Mesazhet e fushatës përfshinin akuza të forta, si pretendimi se ICE po “ndërton një ushtri për të deportuar fqinjët tanë” dhe se po krijon “një shtet policor të ushqyer nga inteligjenca artificiale”. Disa slogane shfaqnin edhe fotot e dy qytetarëve amerikanë, Renee Good dhe Alex Pretti, të cilët sipas aktivistëve u vranë nga agjentë federalë gjatë operacioneve të kontrollit të emigracionit në Minneapolis në janar 2026.
Protestat u shtrinë edhe përtej çështjes së emigracionit. Producentja Elizabeth Woodward dhe aktorja Saja Kilani nga filmi palestinez La voce di Hind Rajab mbajtën spila me sloganin “Artists4Ceasefire”, duke bërë thirrje për ndalimin e luftërave në Iran, Gaza, Ukrainë dhe Sudan.
Ndërkohë aktori spanjoll Javier Bardem, i cili dorëzoi një nga çmimet gjatë ceremonisë, bëri thirrje për një “Palestinë të lirë” dhe mbante në xhaketë një mesazh kundër luftës, të ngjashëm me atë që kishte përdorur vite më parë gjatë protestave kundër luftës në Irak.
