Ceremonia e 98-të e Academy Awards, e zhvilluar në Dolby Theatre në Los Angeles, u karakterizua nga një ritëm i shpejtë, batuta politike dhe disa momente emocionuese në nder të figurave të mëdha të kinemasë.
Fituesi i madh i mbrëmjes ishte filmi “Një betejë pas tjetrës” (Una battaglia dopo l’altra), komedia politike aksion e regjisorit Paul Thomas Anderson. Pas 11 nominimeve pa sukses në të kaluarën, filmi arriti të fitojë tre statuja.
Ceremonia u drejtua nga komediani Conan O’Brien dhe u shoqërua me batuta të tij dhe të Jimmy Kimmel kundër Donald Trump, ndaj dosjeve të diskutueshme të Jeffrey Epstein dhe ndaj kufizimeve të lirisë së shprehjes, ku madje u bë një krahasim ironik mes rrjetit televiziv CBS dhe Koresë së Veriut.
Siguria ishte e lartë për shkak të situatës ndërkombëtare, me zona të bllokuara rreth teatrit, ndërsa protesta kundër policisë federale të emigracionit u zhvilluan si jashtë ashtu edhe brenda eventit.
Mesazhin më të fortë politik e dha aktori spanjoll Javier Bardem, i cili deklaroi nga skena: “Jo luftës së paligjshme dhe Palestinë e lirë”.
Ceremonia pati edhe momente shumë emocionale. Legjenda e muzikës dhe filmit Barbra Streisand përkujtoi mikun e saj Robert Redford duke kënduar këngën “The Way We Were”. Ndërkohë aktori Billy Crystal dhe kolegë të tjerë dolën në skenë për të nderuar regjisorin Rob Reiner dhe bashkëshorten e tij, të cilët u vranë në dhjetor.
Në kategoritë kryesore, çmimi për aktorin më të mirë iu dha Michael B. Jordan për rolin e tij në filmin I peccatori. Ndërsa aktorja irlandeze Jessie Buckley fitoi çmimin për aktoren më të mirë për interpretimin në filmin Hamnet, duke ia dedikuar çmimin “kaosit të bukur që është zemra e një nëne”.
Një nga momentet që tërhoqi vëmendje ishte edhe mungesa e Sean Penn, i cili fitoi çmimin për aktorin më të mirë dytësor, por nuk ishte i pranishëm për ta marrë personalisht.
Në mesin e fituesve të tjerë ishte edhe filmi fantastiko-shkencor Avatar: Fuoco e cenere për efektet vizuale, ndërsa filmi Frankenstein fitoi për skenografinë, kostumet dhe grimin.
Edicioni i këtij viti i Oscar-eve u shndërrua kështu jo vetëm në një festë të kinemasë, por edhe në një pasqyrë të një Amerike të polarizuar, ku arti, politika dhe debatet shoqërore u ndërthurën në të njëjtën skenë.
