Si Zara i bëri ballë H&M dhe Shein. Një prekje luksi ka bërë diferencën, shkruan The Economist
Kalimtarët që shohin reklamat e Zara-s në Instagram mund të ngatërrohen fare lehtë duke menduar se janë reklama të Chanel. Për fushatën e 50-vjetorit pranverën e kaluar, marka spanjolle e modës punësoi Steven Meisel, një fotograf i njohur për bashkëpunimet me shtëpitë e luksit.
Edhe stilisti i flokëve dhe artisti i grimit në set kishin një profil të ngjashëm. Reklamat përfshinin pothuajse çdo modeli të paguar më mirë të 30 viteve të fundit, duke kërcyer nën ritmet e këngës “I Feel Love” të Donna Summer.
Ky shkëlqim pasqyron një strategji fituese për Inditex, grupin spanjoll të veshjeve që mbështetet te Zara për rreth dy të tretat e shitjeve. Konkurrenca nga marka si Shein dhe Temu, dy shitës kinezë, i ka shtyrë disa rivalë të ulin çmimet. Por Inditex ka konkurruar me stilin dhe jo me koston, thotë Geoff Lowery nga Banka Rothschild.
Më 11 mars, kompania raportoi rezultate shumë të forta. Shitjet vjetore u rritën në 40 miliardë euro në vitin 2025 dhe fitimi neto arriti një rekord prej 6.2 miliardë eurosh, me një rritje 6% krahasuar me një vit më parë.
Shitja e veshjeve të modës së shpejtë, të njohur si fast fashion, të ofruara me një imazh dhe përvojë më pranë luksit, po jep rezultate pozitive.
Óscar García Maceiras, drejtuesi i Inditex, ia atribuon një pjesë të madhe të suksesit modelit të biznesit të ndërtuar që prej gjysmë shekulli. Amancio Ortega, themeluesi, e ngriti kompaninë mbi një rrjet logjistik elastik që i lejon të përshtatë shpejt koleksionet sipas shijeve të klientëve.
Zara dhe markat e saj simotra synojnë të ofrojnë produkte të reja çdo javë, ndonjëherë edhe dy herë në javë. Kjo ul rrezikun e prodhimit të veshjeve që nuk shiten dhe që duhet të ofrohen me zbritje të mëdha.
Njëkohësisht, i lejon Zara-s të mbajë çmime më të larta, pasi koleksionet reflektojnë shpejt trendet e momentit.
Kur Shein dhe marka të tjera kineze hynë në treg në fillim të viteve 2010, ato konkurruan me shpejtësinë dhe çmimin. Kjo e dëmtoi më pak Zara-n sesa rivalin e saj europian H&M, pasi kishte një gamë më të gjerë produktesh, përfshirë edhe artikuj më të shtrenjtë.
Zara synon klientë në të 30-at dhe të 40-at, të cilët priren të kenë të ardhura më të larta se klientët e H&M, vëren William Woods nga Bernstein. Si rezultat, Inditex ka kaluar dukshëm përpara rivalit. Në vitin 2009, fitimet operative të dy kompanive ishin thuajse në të njëjtin nivel; sot, ato të Inditex janë gati pesë herë më të larta.
Së fundmi, Zara është orientuar edhe më shumë drejt segmentit të lartë. Në fund të vitit 2021, ajo emëroi Marta Ortega, vajzën e themeluesit, si kryetare. Ajo ka synuar t’u ofrojë konsumatorëve një përvojë më pranë luksit.
Këtë javë, marka njoftoi një bashkëpunim me John Galliano, një stilist i njohur për koleksionet e tij të rafinuara gjatë kohës në Dior dhe Maison Margiela.
Ajo ka bashkëpunuar gjithashtu me Stefano Pilati, ish-dizenjues kryesor i Saint Laurent. Zara madje ka hyrë edhe në stilimin e personazheve të njohur, duke veshur këngëtarin Bad Bunny për performancën e tij në Super Bowl në shkurt.
Ky orientim do të thotë se Zara po fokusohet gjithnjë e më shumë në tregjet më të pasura. Vitin e kaluar, dy të tretat e shitjeve të kompanisë mëmë erdhën nga Europa. Marka ka reduktuar numrin e dyqaneve me një të pestën në tre vitet e fundit, duke përgjysmuar praninë në Kinë, ku kërkesa ka qenë më e dobët.
Gjithashtu, ajo ndërpreu operacionet në Rusi pas fillimit të luftës në Ukrainë.
Megjithatë, dyqanet që mbeten janë më të mëdha dhe më luksoze. Nga viti 2022 deri në 2025, shitjet për metër katror janë rritur me 46%, sipas Deutsche Bank. Disa dyqane kanë zona të veçanta në stil butiku për çanta dhe këpucë, të ngjashme me ato të dyqaneve të nivelit të lartë.
Edhe përvoja e blerjes po ndryshon. Shumë klientë kërkojnë “diçka që shkon përtej thjesht blerjes së veshjeve”, thotë García Maceiras. Dyqanet kanë futur kasa vetëshërbimi për t’u dhënë stafit më shumë kohë të veprojë si këshilltar personal për klientët.
Ky nivel kujdesi po u përshtatet gjithnjë e më shumë klientëve të Zara-s, të cilët po mësohen gradualisht me një prekje luksi.
