Shumë njerëz e bëjnë pa u menduar dy herë: rikthehen në makinë dhe pijnë nga shishja e ujit që ka qëndruar aty prej orësh apo ditësh. Por ekspertët paralajmërojnë se ky zakon mund të jetë më i rrezikshëm sesa duket.
Sipas specialistëve, një shishe uji e lënë në automjet, sidomos gjatë verës, mund të kthehet në një burim bakteresh dhe mikroplastikash për shkak të temperaturave të larta dhe ajrit të ndenjur brenda kabinës.
Sa më gjatë të qëndrojë shishja në makinë, aq më i madh bëhet rreziku. Një shishe e harruar për pak orë nuk krahasohet me një tjetër që ka qëndruar për ditë të tëra nën diell.
Nxehtësia jo vetëm ndryshon shijen e ujit, por nis edhe degradimin e plastikës. Pas më shumë se 24 orësh, mikroorganizmat mund të shumohen, ndërsa materiali plastik fillon të shpërbëhet gradualisht përmes proceseve kimike dhe fizike.
Ekspertët theksojnë se ka dallim mes një shisheje të hapur dhe një të mbyllur. Një shishe e mbyllur ruan sterilitetin dhe ka më pak rrezik nga bakteret, por mbetet problemi i lëshimit të substancave nga plastika për shkak të temperaturës. Ndërsa një shishe e hapur mund të kontaminohet lehtësisht nga mikrobet apo viruset pas kontaktit me gojën.
Situata bëhet edhe më problematike për pijet me sheqer, si çajrat apo lëngjet e frutave, sepse sheqeri favorizon shumëfishimin e baktereve dhe majave.
Ekspertët këshillojnë të shmangen pijet që kanë qëndruar për ditë në makinë dhe të kontrollohet gjithmonë pamja e lëngut: nëse është bërë i turbullt, ka ndryshuar ngjyrë apo ka mbetje të dukshme, nuk duhet konsumuar.
