Një studim i ri nga Universiteti i Kalifornisë në Riverside tregon se ekspozimi i babait ndaj mikroplastikave para se të bëhet prind mund të rrisë rrezikun që fëmijët e tij të zhvillojnë probleme metabolike, si diabeti.
Në studime të bëra te minjtë, meshkujt e ekspozuar ndaj mikroplastikave patën pasardhës që, kur u ushqyen me ushqime të pashëndetshme dhe me shumë yndyrë, shfaqën probleme serioze shëndetësore. Vajzat ishin më të prekura: ato zhvilluan shenja të diabetit dhe probleme me sheqerin në gjak. Djemtë nuk zhvilluan diabet, por u vunë re ndryshime në mënyrën se si trupi i tyre ruante yndyrën.
Shkencëtarët zbuluan se mikroplastikat mund të ndikojnë te fëmijët përmes spermës së babait, pa ndryshuar ADN-në. Ato ndryshojnë mënyrën se si disa gjene “ndizen” ose “fiken” gjatë zhvillimit të hershëm të fëmijës.
Edhe pse studimi është bërë te minjtë, fakti që mikroplastikat janë gjetur edhe në trupin e njeriut është shqetësues. Studiuesit këshillojnë që burrat që planifikojnë të kenë fëmijë të përpiqen të kufizojnë kontaktin me ndotjen plastike.
