Në shumë lagje të Londrës po shfaqet një trend i ri që po ndryshon peizazhin e fitnesit urban. Mes salloneve të thonjve, dyqaneve të vapave dhe fast-food-eve me pulë të skuqur, gjithnjë e më shpesh po hapen studio elegante dhe misterioze të reformer pilates, një formë stërvitjeje që kërkon pajisje të posaçme dhe që po bëhet gjithnjë e më popullore.
Në fundjavë, grupe të tëra njerëzish shihen duke hyrë në këto ambiente që janë kthyer në “tempuj” të rinj të kujdesit për trupin. Shumë prej tyre ndjekin edhe një estetikë të caktuar të promovuar në TikTok me hashtagun #pilatesprincess: veshje sportive pastel, aksesorë luksozë dhe gota të mëdha uji që në rrjetet sociale përmenden me humor si “shishe mbështetje emocionale”.
Pavarësisht debateve për imazhin që krijon në rrjete sociale, popullariteti i pilates po rritet me ritme të shpejta. Sipas aplikacionit të rezervimeve sportive ClassPass, kjo stërvitje ka qenë më e kërkuara në botë për tre vite radhazi dhe rezervimet gjatë vitit 2025 u rritën me 66% krahasuar me një vit më parë. Në Mbretërinë e Bashkuar, tregu i pilates dhe jogës vlerësohet rreth 1.1 miliardë paund.
Një rol të madh në këtë bum kanë luajtur edhe personazhet e famshëm që e promovojnë, mes tyre Margot Robbie, Dua Lipa dhe Bella Hadid. Megjithatë, forma që po tërheq më shumë interes është reformer pilates, një variant që përdor pajisje speciale me susta dhe rezistencë për të forcuar muskujt e trupit.
Rritja e interesit është aq e madhe sa edhe numri i instruktorëve po shtohet me ritme të jashtëzakonshme. Të dhënat nga kompania britanike e sigurimeve për biznese Protectivity tregojnë se aplikimet për instruktorë të reformer pilates janë rritur me 948% në vetëm një vit.
Shumë njerëz e shohin pilates si një mënyrë për të transformuar trupin pa ushtrime shumë intensive. Shpikësi i metodës, Joseph Pilates, premtonte dikur: “Në 10 seanca do të ndiesh ndryshimin, në 20 do ta shohësh dhe në 30 do të kesh një trup të ri.”
Por ekspertët paralajmërojnë se përfitimet nuk janë magjike dhe mund të arrihen edhe me forma të tjera aktiviteti fizik. Sipas studiuesve të shëndetit, pilates është veçanërisht i dobishëm për forcimin e muskujve të thellë të trungut, përmirësimin e qëndrimit dhe rehabilitimin pas dëmtimeve.
Ndërkohë, fenomeni po merr edhe një dimension të ri teknologjik. Në disa studio të reja në Londër, nuk ka fare instruktorë. Pjesëmarrësit hyjnë me kartë dhe ndjekin ushtrimet përmes ekraneve të mëdha me video dhe udhëzime audio, duke ushtruar vetë në pajisjet reformer.
Një zhvillim që tregon se mania e pilates jo vetëm që po pushton qytetet, por po transformon edhe mënyrën se si njerëzit ushtrojnë.
